Konseya YE duh qebûl kir, ku di çarçoveya Polîtîkaya Hevpar a Ewlehî û Parastinê (CSDP) de Mîsyona Sivîl a Yekîtiya Ewropayê (EUMA) li Ermenîstanê were avakirin. Armanca mîsyonê ew e, ku beşdarî avakirina aramî û baweriyê li navçeyên sînorî yên Ermenîstanê bibe û hawîrdorek guncan ji hewildanên Yekîtiya Ewropî re ji bo asayîkirina têkiliyên di navbera Ermenîstan û Azerbaycanê de peyda bike.
“Bi damezrandina mîsyona Yekîtiya Ewropayê ya li Ermenîstanê, qonaxeke nû ya tevlêbûna Yekîtiya Ewropayê ya li Kafkasya Başûr dest pê dike. YE wê piştgiriya hewldanên kêmkirina rageşiyê bidomîne û pabend e, ku ji nêz ve bi her du aliyan re ji bo pêkanîna aştiya domdar li herêmê bixebite,” Nûnerê Bilind ê Karûbarê Derve û Polîtîkaya Ewlekariyê Josep Borrell got.
Li ser daxwaza Ermenîstanê, EUMA wê dewriyeyên birêkûpêk pêk bîne û li ser rewşê rapor bike, ku ev yek wê têgihîştina YE ji rewşa li ser erdê xurt bike.
EUMA wê xwediyê erkek destpêkê ya du salan be, navenda operasyonê wê li Ermenistanê be. Mîsyona sivîl wê ji hêla Stefano Tomat ve were rêvebirin. Di demeke nêz de, ji bo birêvebirina operasyonên li bejahiyê wê serokê şandeyê were destnîşankirin.
