Serokwezîrê Komara Ermenistanê Nîkol Paşînyan ragihand ku xebat ji bo vekirina sînorê Ermenistan-Tirkiyê û îmzekirina peymana aştiyê ya dawî bi Azerbaycanê re di zûtirîn dem de berdewam dike.
Serokwezîr ev yek di dema brîfîngeke piştî civîna hikûmeta Ermenistanê de got.
Serokwezîr got, “Ez bawer dikim ku dem hatiye ku têkiliyên di navbera rayedarên Ermenistan, Azerbaycan û Tirkiyeyê de bibin beşek ji têgihîştina giştî ya çalakiyên xebata rojane.” Bi balkişandina ser zêdekirina têkilî û civînên di navbera rayedarên welatên jorîn de, Serokwezîr Paşînyan di derbarê çarenûsa vekirina sînorê Ermenistan-Tirkiyê, û her weha perspektîfên îmzekirina peymana aştiyê ya dawî bi Azerbaycanê re axivî û destnîşan kir ku di vî warî de tu nûçe tune.
Serokwezîr got, “Tiştek nû tune, lê di heman demê de rastiya ku xebata rojane pêk tê jî heye. Em hewl didin ku derfetan bibînin da ku têkiliyan di aliyên cûda de pêşve bibin.”
Di vê çarçoveyê de, wî her wiha bi bîr xist ku yek ji şîrketên hewayî yên Tirkiyeyê berê dest bi geştên ber bi Ermenistanê ve kiriye.
Paşînyan destnîşan kir, “Em hêvî dikin ku yek ji şîrketên hewayî yên Tirkiyeyê jî geştên ber bi Gyumri ve bike.”
Serokwezîr tekez kir ku ji bo wî pirs ne ew e ku vekirina sînorê Ermenistan-Tirkiyeyê an îmzekirina peymana aştiyê ya Ermenistan-Azerbaycanê dê pêk were, pirs ew e ku kengê dê pêk were.
Li gorî Serokwezîr Paşînyan, niha xebat tê kirin da ku ev bûyer di zûtirîn dem de pêk werin.
