Di çend rojên pêş de dibe ku hejmara giştî ya kesên ku ji Karabaxa Çiya bi darê zorê koçber bûne bigihêje 120 hezarî. Ev hema hema bi tevahî nifûsa ermenî ya dorpêçkirî ye. Ev yek ji aliyê nûnera Ofîsa Komîseriya Bilind a Penaberan a Neteweyên Yekbûyî Kavita Belanî ve hat ragihandin, BBC dinivîse.
Li gorî nûnerê UNHCR, girseyên mezin ên mirovên westiyayî û bi tirs li navendên tomarkirinê yên li Ermenîstanê kom bûne û tê de penaberên ku ev 9 meh in rastî dorpêçê hatine, pêşwazî dikin.
Kavîta Belanî, di bersiva pirseke derbarê hejmara penaberan de, piştrast kir: “Em amade ne ku heta 120 hezar kesî qebûl bikin, lê niha, di vê qonaxê de, pir zehmet e ku pêşbîniya wê çendê bike.”
Wê herwiha eşkere kir ku di destpêkê de Yêrêvan pêşwaziya 70-90 hezar penaberan dikir, lê divê ev hejmar bên nûjen kirin.
Rêvebira Herêmî ya UNICEF Regina de Dominicis ji rojnamevanan re got, hema sêyeka hejmara giştî ya penaberên ji Nagorno-Karabaxê zarok in.
“Tiştê ku em herî zêde nîgeran in ew e ku gelek [ji van zarokan] ji malbatên xwe hatine veqetandin,” wê got jî.
Li gorî nûnerê Federasyona Navneteweyî ya Civakên Xaça Sor û Heyva Sor, Hîşam Diab, gelek mirovên jicîhûwarkirî – hem mezin û hem jî zarok – bi tevahî westiyayî ne û bi lez hewcedariya wan bi piştgiriya psîkolojîk heye.
“Malbat pir caran digihîjin cihê ku zarok ewqas lawaz in ku ew bi tenê di hembêza dêûbavên xwe de hişê xwe winda dikin,” wî got.
Li gorî yek ji serkirdeyên Komîteya Navdewletî ya Xaça Sor, Carlos Morazzani, di pêşerojê de Xaça Sor dê giraniyê bide alîkariya wan kesên ku hîn li Qerebaxê mane. Dê ji wan re kîtên kesane werin şandin, ku tê de hilberên xwarinên bingehîn û tiştên paqijiya kesane hene.
“Me li bendê bû ku pêvajoya valakirinê dirêjtir bibe,” wî qebûl kir. “Tevî ku me vê hefteyê karîbû gelek mirovan derxînin jî, gelek ji wan di encamê de asê man.”
