PoliticsTop

Эздийе дьне-а҆ләме qәдре щангорийе qьр҆е гьртьн

Эздийе дьне-а҆ләме р҆ожа шәмийе, 3-е мәhа т҆әбахе, бь ә҆мәле биранине 5-салийа qьр҆а Шәнгаледа данә к҆ьвше. Т҆әдбире биранине Шәнгале у т҆әмамийа дьниаеда дәрбазбун, ль к҆ӧ мащьрата эздийа дьжи.

ИРАQ

Т҆әмамийа гӧнд у шәhәре Ираqейә эздийада qәдре биранина щангорийе qьр҆е гьртьн. Гәнди Шәнгаледа конферанса мәзьнә hьндава ״Фьрqа эздиайә сәва пешдачуйине״-еда т҆әшкилкьри дәрбазбу, wәхта к҆ижане шӧхӧлване щьваки, сиасинас у бьнәлийе шәhәр hазьрбун. Р҆остәм Бәк҆ойане депутате Щьвата Әрмәнистанейә мьләтийе у Т҆емур Худойане жур҆налисте эзди hазьрбун. Эзди, е кӧ т҆опраха К҆ӧрдьстана Ираqеда дьжин, qӧва Лальшеда щьвйан, ль к҆ӧ wәк҆иле шеwра эздиайә  олийә Һәрәбьльнд хьзмәт кьрьн. Дӧ р҆ожа пешда, 1-е мәhа т҆әбахе, Бәг҆дайеда конферанса саланә дәрбазбу, йа п҆ешк҆еши пенщсалийа qьр҆а  Шәнгале кьри. Wәк҆иле шеwьрхана Ираqе, шӧхӧлване щьваки, wәк҆иле т҆әшкиләте орт҆әмьләтийе у сәфирәйе щергә wәлата т҆әв т҆әдбире бун.

АЛМАНИА

Шәhәре алманийи Штутгартеда конферанс бь т҆әвбуна Надийа Мурада хәлатбьра Нобелиейә ә҆длайе дәрбазбу,  йа кӧ wәхта qьр҆е де у шәш бьре хwә ьндакьрьн. Конферанса Штутгартеда Алманиаеда бу йа hәрәмәзьн у әw hьндава шеwра эздийе Алманиаейә мәрк҆әзиеда hатбу т҆әшкилкьрьне. Wәк҆иле мащьрата эздийа ьса жи конферанса гьран Һанновереда дәрбазкьрьн. Бер҆лине у шәhәре дьнда мәшqе биранине дәрбазбун. Алманиаеда мащьрата эздиайә hәрәмәзьн дьжи, бь qимәте  т҆әхмин hәжмара wан дьгьhижә 200.000 мәрьва зедәтьр, п҆ьр҆анийа wан е ьж Ираqе дәрк҆әтинә.

АВРОПА

Ә҆мәле биранине гәлә wәлате Авропайе: Белгиайе, Франсиайе, Нидерланда у Шведийаеда, дәрбазбун.

WАЙ

Мащьрата Линколнейә эздийа (wилайәит҆а Небраскайе) эварийа биранине дәрбазкьр, wәхта к҆ижане Щефф Фортенберрийе конгресмене ьж wилайәт҆а Небраскайе hазьрбу. ״Сәва мьн hӧрмәта гьранә әз 5-салийа qьр҆ева гьредайи нав эла эздийавьм. Ве сәрсалийа зӧлми әм т҆әвайи h҆әзне дькьн. Вьра эздийа мала хwә дит. Ньhа әw к҆ӧбар бьн бәйраqа Америкайеда дьжин у пер҆а жи ә҆дәте хwәйә qәдим хwәйдькьн״,- Щефф Фортенберри ә҆ламкьр, бь пешдаhатьна бәр т҆әвбуйе т҆әдбире.

АВСТРАЛИЙА

Qәдре биранина щангорийе qьр҆е Австралиаеда гьртьн, ль к҆ӧ мащьрата эздиайә hәрәщаhьл дьжи. Мале пешьн пәй qьр҆а Шәнгалер҆а щигӧhези Австралиайе бун, wи чахи дәргә-диwане wәлет пьшта qьраре гьртьн, wәки ״визайе мәрьвдостиейә мәхсус״ бьдьнә эздийа у хачп҆ареза. Шәhәре  Австралиаейә Тувумбайе у Вагга-Ваггайеда щангорийе qьр҆е анин бир… 3-е мәhа сала 2014-айә т҆әбахе тьрск҆аре״Дәwләта исламийе״ беасьтәнг к҆әтьнә шәhәре Шәнгале, ль гәлә нәh҆ийе дьн, к҆идәре h҆имли эзди дьман. Тьрск҆аре ДИ мьqабьли эздийе бьнәли qьр҆ миасәркьрьн. Нав h҆әвтйе пашwәхтийе тьрск҆аре ДИ 5000 мере эздийа зедәтьр идамкьрьн, ле ьса жи 7000 кәч҆ у  жьна зедәтьр т҆әсмили зордәстийа сек҆суал у hесиркьрьне кьрьн. зар҆е эздийа ьж мале хwә hатнә щӧдакьрьне у кьрьнә ислам. Пашwәхтийе зар҆ бь р҆әwша щанфидаwийа hатнә хәвтандьне. Һьндава тьрск҆арада 70 ибадәтгәh у п҆арьстгәhе эздийа зедәтьр hатнә т҆ӧнәкьрьне.

Дьhа зедә бьдьнә к҆ьвше
Back to top button